بەراورد

بەراورد

07/10/2020

نوسەران و ڕۆشنبیرانی کورد بەبەردەوامی بەراورد لە نێوانی کورد و هەندێك لە نەتەوەکانی دیکە بەتایبەتی جولەکە و نەتەوەی دیکەدا لە دروستکردنی دەوڵەت-نەتەوەدا، دەکەن.  ئەمانە لەتەك سەرکردەی بزوتنەوەکانی کوردا،  کورد بە خۆفرۆش و  کاڵفام و گەمژە و دەبەنگ دەزانن و سوکایەتی دونیای پێدەکەن کە گوایە ئەو تۆمەتانە و زۆری تر هۆکارێك بوون  کە دروستکردنی  دەوڵەتیان لەدەستداوە.

دیارە من لێرەدا نە پاساو بۆ هەڵە و ساویلکەیی سەرکردەکانی کورد و سیاسەتمەداریان دەهێنمەوە نە لایەنگری دەوڵەتیشم ئیدی بۆ هەر نەتەوەیەك بێت، بەڵام دەڵێم ئەوانەی کە ئاوا بیردەکەنەوە یاخود هیچ لەمێژوی سیاسەتی دەرەکی  وڵاتانی زلهێز نازانن یاخود هەر قسەی قەبە و حەماسیمان پێدەفرۆشن بۆ مەبەستێکی تایبەتی خۆیان یاخود دەیانەوێت مێژوو ئاوا ببینن کە خۆیان دەیانەوێت نەك وەکو ئەوەی کە هەبووە و هەیە.

سەرەڕای ئەوانەش دانی ئەم ڕایانە بێ ئاگایی تەواوە لە ئەزموونی گەلان و بەرژەوەندی زلهێزەکان و فێڵبازیی و ساختەچێتی سیاسەتمەدارەکانیان.

پێشتریش و ئەمڕۆش هەر نەتەوەیەك بوبێتە خاوەنی دەوڵەت وەکو جولەکە و گەلی ڕۆژهەڵاتی تیمۆر و گەلانی ناوچەی بولقان  و تد… هۆکاری سەرەکی ئەو سەرکەوتنەیان کە دروستبوونی دەوڵەت بوە هەر بە تەنها نەگەڕاوەتەوە بۆ زروفی ناوخۆ و ڕاستی سیاسەت و تەقەلای سیاسەتمەنداراکانیان و ئازایەتی خۆیان ، بەڵکو زیاتر گەڕاوەتەوە بۆ زروفێکی مێژویی تایبەتی ، بۆ قۆناخێکی تایبەتی ، بۆ لەبەرچاوگرتنی بەرژەوەندی تایبەتی وڵاتانی زلهێز و وڵاتە ئەوروپییەکان و بۆ ئەو ئاڵوگۆڕە زەرووریانە کە لە دیدی ئەوانەوە پێویستبووە کە لە ناوچەکانا ڕووبدات ..زۆری تر کە ڕۆڵی هەرە سەرەکییان لە دروستبوونی دەوڵەتدا هەبووە و هەیە.

میللەتی کورد بە درێژایی دوو سەدەیە لەو بوارەدا بزوتنەوەی دروستکردووە و خەڵکانێکی ڕەش و ڕووتی یەکجار زۆر دراوە بە کوشت [ دیارە قسەی من لەسەر دروستی نادروستی بزوتنەوەکە و ئایا دەرەبەگی ، بورجوازی ، بەکرێگیراو …تد نییە ، من تەنها لە گۆشەی ئیمکانیات و ئەگەری بوونی دەوڵەتەوە قسە دەکەم، نە لایەنێکی دیکە] لە دروستکردنی ئەمارات و دەسەلاتێکی ناوچەیی ، هەندێك جار بۆ ماوەیەك توانیوانە دەوامی پێبدەن ، بەڵام دواجار ئەو دەسەڵاتە هەرچی بووبێتت لە بەرژەوەندی دەسەڵاتدارای گەورە ، هێزە سەرەکییە نێودەوڵەتییەکان ، یاخود دەوڵەت و دەوڵۆتکەی ناوچەکان کە بە شەێك بوون لە بەڕێکەری سیاسەتەکانی زلهێزەکان. 

کتێبە مێژووییەکان بە تایبەت کتێبی ” کورد و عەجەم” مێژوی سیاسی کوردەکانی ئێران نوسینی صاڵح محەمەدئەمین ، 1992، زۆر بە جوانی ئەو لایەنانە دەردەخەن گەرچی خودی کتێبەکە زۆر پەرپوتە و دووبارە بونەوە و بەرچاو نەگرتنی ڕیزکردنی زنجیرە ڕووداوە مێژووییەکانی، عەیبی گەوەرەی ئەم کتێبەن بەڵام لەگەڵ ئەوەشدا خوێندنەوەی زۆر بە سوودە بۆ ئەوانەی کە تا ئێستاش لە خەونی بەدەوڵەتبوونی کورد و کێشانی ئاخ و حەسرەت بۆی، کە لە کۆندا دروست نەبووە، پێویستە.    

 

About author View all posts

Zaher Baher

Leave a Reply

Your email address will not be published. Required fields are marked *