ئەی ئێوە کەم لەشکرکێشیتان کردووە؟

ئەی ئێوە کەم لەشکرکێشیتان کردووە؟

07/09/2020

مێژوی ئێوە مێژویەکی پڕ لە تاوانە چ لە شاخ و چ لە شار، قێزەوەنە، پڕە لە خیانەت و یەکدی کوشتن و ژنکوشتن و دەنگی ئازادکوشتن و بە کوشتدانی منداڵانی خەڵکی کوردستان.  مێژوی ئێوە لە ساڵی 1961 وە تا ئێستا ئەوەندە ڕەشە کە  لەوە ڕەشتر نییە ، مێژویەکی پڕ لە شەرمەزاریی، کە خەڵکی نێو میللەتەکەی خۆی بە میللەتەکەی خۆی کردبێت .  من لە ئێوە مێژوڕەشترم  بەرچاو ناکەوێت.

ئێستاش بێ شەرمانە دێن و دەڵێن پەکەکە بووەتە مایەی لەشکرێشی تورکیا بۆ سەر هەرێم !!!  جارێ پێشەکی تورکیا لەشکرکێشی بۆ سەر هەرێم نەکردووە ، بریا وابوایە ، چونکە هەرێم ئێوەن یەکێتی و پارتی و گۆڕان و جڕوجانەوەرەکانی دیکە، نەك کوردستان.

 ‌هەرێم میللەت نییە ، ئەوەی کە پێی دەوترێت هەرێم و خاکی هەرێم و بەرژوەندی هەرێم و سامانی هەرێم…. ئێوەی دەسەڵاتدارن ، نەك خەڵکی ئاسایی کوردستان ، ئەوە ئێوەن کە هەموو ئەوانەتان لەژێر دەستدایە نەك میللەت .

دووەم : ئەی ئێوە ، لەشکرکێشییەکانتان لەبیر چووەتەوە؟ مێژوی ئێوە پرە لە لەشکرکێشی هەر تەماشای پاسدارکێشان بۆ سەر کەرکوك، سوپاکێشی بەعس بۆ سەر هەولێر ، لەشکرکێشی بە سوپاو حەشدی شەعبی و هێزی ئەمنەوە لە  15 و 16 ی ئۆکتۆبەر.  خۆ ئەگەر تەمەنی حوكمڕانیتان درێژتر بێت بێ گومان ئەوانەمان کە دەمێنن لەشکرکێشی دیکەش دەبینن.   ئەمە جگە لەوەی کە بە درێژایی ئەم هەموو ساڵە لەو کاتانەشیدا کە بە ئاشکرا لەشکرکێشیشتان نەکردبێت پاسدارکێشی ، ئیتڵاعات کێشی ، میت کێشی ، سیخور کێشی … هەموو ئەمانەتان کردووە و هەمیشەش بەردەوامبوون لە دانی زانیاری لەسەر نەیارانتان بە خاوەنی لەشکرەکان.

ئێوە چیتان نە ” کێشاوە” و نەهێناوە ؟  ئێوە لەشکری برسێتیان هێناوە ، لەشکری بێ موچەیی و بێ کاریتان هێناوە ، لەشکری مەحرومبوون لە خزمەتگوزاریتان هێناوە،  لەشکری ترس و دڵەڕاوكێی و تیرۆری دەنگی نەیار پێتان، هێناوە ، لەشکری مەحفکردنەوەی کولتور و گیانی بەتگەوەهاتن و نەبوونی  خۆشەویستیتان هێناوە ، ئێوە لەشکری بازرگانیی و ململانێ لەسە کەڵەکردنی سامان و دارایتان هێناوە ، ئێوە لەشکری جەهالەت و نەزانیتان بەرداوەتە گیانی خەڵکی ، لەشکری بێ متمانەیی و بێ بروابوون و نامۆیی و خۆكوشتنتان هێناوە …

ئێوە هەموو لەشکرکێشییەکتان کردوە و بەردەوامن، هەموو دەستپێشکەریی و دۆزینەوەیەکی بێزراوتان بۆ خەڵکی هێناوە …. کەواتە ئێوە هەر بە لەشكرکێشی دەسەڵاتی فاشی عێراق و  دەرو دراوسێوە نەوەستاون بەڵکو کۆمەڵێكی دیکەش لەشکرکێشیتان کردووەو هێناوە هەر وەکو لە سەرەوە نوسیم .  ئێستاش ئەو لەشکرکێشییەی کە دەوڵەتی تورکییە دەیکات ، ئێوەن زانیاری پێدەر و پێشڕەوی ئەو لەشکرکێشییە ، هەی بێ ئابڕووانە!!!!

About author View all posts

Zaher Baher

Leave a Reply

Your email address will not be published. Required fields are marked *