لە وەڵامی دۆستێکدا

لە وەڵامی دۆستێکدا

14/07/2020

ئەگەر بڕیار بیت خەباتی هەنووکەیی دژ بە دەروێش و دەروێشایەتیی و شێخ و شێخایەتی بێت، ئەوە ڕاسستترە لە دەروێش و شێخە ” مۆدێرینەکانەوە” دەست پێبکرێت، نەك تەقلیدییەکان.

دۆستێك پەیامێکی بۆ ناردوم دەڵێت ” تۆ لەسەر هەوو شتێك دەنوسیت گەلێك لە نوسیەنەکایشتم بە دڵە ، بەڵام هیچت نەوت لەسەر هاتنی ئەم دەروێشانە بۆ پرسەی شێخ محەمەدی کەسەنەزان”

دۆستی ئازیزم:  پێشەکی دەڵێم من 20 ساڵە لەسەر دەروێش و دەروێشایەتی دەدوێم و دەنوسم.

مەسەلەی دەروێشایەتی  و خەلیفەیەتی و تەسەوف، نەریتێکی زۆر کۆنە و ڕواڵەتێکی یاخود مەیدانێکی سەدان ساڵەی گەورەی کۆمەڵایەتی ئێمەی، بەخۆوە گرتووە.  هەمیشەش جیاوازییەك هەبووە لە نیوانی دەروێشانی ئیماندار و دڵسۆز و پاکدا لەگەڵ شێخانی دروۆزن و نۆکەر و بێ باوەڕدا.  ئەمانە سادەو ساکارانە دینەکەیان وەرگرتووە هەر بەو سادەیەش وادەزانن ئەرك و فرمانی خواکەیان بە جێدەهێنن لە عاقییەبوون و پەرسستنی شێخەکانیانا.

من نازانم ئایا تۆ نەوەی نوێیت یاخود نەوەی سەردەمی من، یا بڕێک گەنجتر .  من بە منداڵی و بە گەنجێتی هاتنی دەروێش و زیکر و تەهلیلەو و تەپڵ ووەشاندنی شمشێر و شووشەو و گڕی ئاگرخواردن و سیغ دان لە گوپ و سکیانم، هەموو دیتون .

ڕەنگە تۆ و نەوەی تۆ ئەمەیان نەدیبێت بەڵام ئێوە جۆرێكی دیکەتان لە دەروێشایەتی و شێخایەتی  دیتوە کە ئەویش دەروێشەکانی حیزبن ، کۆیلەکانی ڕابەر و سەرکردەکانن.  ئێمە لە ماوەی ئەم چەند ساڵەی پێشوودا ئاپورای ئەم دەروێشانەمان لە مردنی شێخەکانیانا، بینی.  بۆ نموونە وەفاتی جەلال تاڵەبانی و نەوشیروان موستەفا.  ئیدی نازانم بۆچی دەبێت بە هاتنی ئەم دەروێشانە بۆ سپاردن بە خاکی شێخەکەیان سەرسام بین. مەگەر غەریبی ڕووداوەکە هەر سەردەمی کۆرۆنابێت کە هەمووان پێویستمان بە خۆپارێزی و خەڵکپارێزی و ڕێگرتن لەم ئافاتەیە ، دەنا هاتنیان و سەما و زیکر و تەهلیلە و …. ئاساییە.

گەر ڕاستیشت دەوێت ئەم دەروێشە کۆنانە خەڵکانی هەژار و بێ زەبر و بێ زیانن، پێچەوانەی دەروێش و موریدەکانی خانەقای حیزبەکانن.  ئەمان کە شێخەکەیان دەمرێت ئیتر زۆر زەحمەتە جارێکی دیکە بچنەوە سەر نزرگەکەی و بە دەگمەنیش ناوی دەهێنن، بەڵام هەرچی موریدی حیزبەکانن بە مردوویش شێخ و ڕابەریان بە جێناهێڵن و زیارەتی مەرقەەدەکەیان دەکەن و لە بۆنە و ڕووداوەکانا ناویان دەهێنن و ئاماژە بە قسەکانیان دەکەن و وێنەکانیان هەڵدەواسن و دەیدەن لە یەخەی کراس و چاکەتەکەیان و دەیکەنە پرۆفایلی پەیجی فەیسبوك و شاشەی تەلەفونەکانیان. لەمانەش خراپتر بە مردووییش پاش ساڵانێکی دوور و درێژ هێشتا هەر ڕابەرییان دەکەن.

من هەرگیز لە بیرم نایە شەڕی چەکداریی یا بە شمشێر، هەتا هەڵمەتی پاگەندەیش مەگەر بەدەگمەن ئەو پاگەندەیە بووبێت، لە نێوانی تەریقەتی قادریی و نەقشبەندیدا بووبێت ، بەڵام دەروێشانی تەکییەو خانەقاکانی حیزبەکانی کوردستان گردێك ، شاخێك ، دەشتییەك ، شارێك نەماوە کە کەلەسەری یەکدیان بە گولە لەوێدا، هەڵنەگرتبێت .  دەروێشەکانی شێخ هەتا بڵێی هەژارن تیکەی دەمی خۆیان و خێزانیان دەگرنەوە و دەیبەن بۆ مەرقەد، بەڵام دەروێشانی حیزبەکان تیکەی دەمی هەژاران لە دەمیان دەفڕێنن، دزییان لیدەکەن، سەرانە و سورانەیان لێدەسەنن نەك هەر بۆ شێخەکانیان بەڵکو بۆ خودی خۆشیان.

دەروێش دڵی پاکە و ساویلکەیە، خێرخواز و چاکەکەرە ، هەژاری ماڵی خۆیەتی، بەڵام دەروێشانی حیزبەکان گەر چی ساویلەکەن بە بارێکی دیکەدا ، بەڵام زۆڵن ، ڕاپۆرتدەرن، ملشکێنن، دواێنپیسن ، بکوژن .

دەروێش نە تیرۆر و نە کوشتنی ژنانی دانەهێناوە بەڵام موریدەکانی حیزب لە تیرۆر بە هەموو چەشنەکانییە [ جەسەدی، شەخصی …تد]  و ژن کوشتن، کەمیان نەکردووە و تەنانەت داهێنانیشیان تێدا کردوو.

لە ڕوی هۆشیاریی و ئاوەزیشەوە جیاوازی نێوانی دەروێش و موریدانی حیزب سەبارەت بە گۆڕانی کۆمەڵایەتی جیاوازییان نیییە، هەردوولایان کۆمەڵ لە جەهل و دواکەوتوویی و نەبوونی دەروی ڕزگارییدا دەهێلنەوە، ئەمیان بە پەنای شێخ و خوا، ئەویان بە پەنای حیزب و ڕابەر دەیانەوێت دونیا بگۆڕن، کە هیچیان نایگۆڕن.

ئەزیزم: زۆر شتی دیکە هەیە، هەرەها جیاوزی زۆری زیاتر لە نێوانی ئەم دوو جۆرە دەروێشانەدا هەیە ، بەڵام من زیاتری لەسەری ناڕۆم نەبا تۆ لەبەر درێژی وەڵامەکەم ڕایەڵەی تەرکیزت لەسەریی ، ببچڕێت و بێزار بیت .  بۆیە لێرەدا دەیبڕمەوە ، تەنها ئەوەندە دەڵێم :

ئەگەر بڕیار بیت خەباتی هەنووکەیی دژ بە دەروێش و دەروێشایەتیی و شێخ و شێخایەتی بێت، ئەوە ڕاسستترە لە دەروێش و شێخە ” مۆدێرینەکانەوە” دەست پێبکرێت، نەك تەقلیدییەکان.

 هیوای سەلامەتی  و تەندروستی باشت بۆ دەخوازم .

About author View all posts

Zaher Baher

1 CommentLeave a comment

Leave a Reply

Your email address will not be published. Required fields are marked *